राप्ती स्वास्थ्य विज्ञान प्रतिष्ठानमा अध्ययनरत बिएनएस, बिएस्सी नर्सिङ र एमबिबिएस बिद्यार्थीहरुलाई बिहीबार स्वागत गरिएको छ ।
प्रतिष्ठानका उपकुलपति डा. विकास लामिछाने, निमित्त शिक्षाध्यक्ष प्राडा वसन्त लामिछाने, रजिष्ट्रार प्रा.श्याम लम्साल, निमित्त डिन डा. रमेश कँडेल, निमित्त अस्पताल निर्देशक डा. जनार्दन पन्थीले विद्यार्थीहरुलाई एक कार्यक्रमका बीच स्वागत गर्नु भएको हो । सो अवसरमा बोल्दै प्रतिष्ठानका उपकुलपति डा. लामिछानेले प्रतिष्ठानको भौतिक पूर्वाधार सम्पन्न गर्न वर्तमान नेतृत्व क्रियाशील भएर लागि परेको बताउँदै प्रतिष्ठानमा ४०० बेडको शिक्षण अस्पतालको भवनको प्रधानमन्त्रीबाटै शिलान्यास गर्ने गरी तयारी भइरहेको जानकारी दिनुभयो । उहाँले दाङलाई मेडिकल हवका रुपमा विकास गर्ने गरी साझा योजना तथा रणनीति बनाएर अघि बढ्नुपर्नेमा जोड दिनुभयो । प्रतिष्ठानका निमित्त शिक्षाध्यक्ष प्राडा. वसन्त लामिछानेले एमविविएस र नर्सिङका विद्यार्थीहरुलाई पढाइ र बसाइको सिलसिलामा कुनै कमजोरी नहुने गरी तयारी गरिएको जानकारी दिनुभयो ।
प्रतिष्ठानका रजिष्ट्रार प्रा. श्याम लम्सालले एमविविएस र नर्सिङको पढाइ दाङमै गर्ने गरी पूर्वाधार, कार्यक्रम अघि बढ्नु दाङवासीका लागि ऐतिहासिक काम भएको भन्दै यहाँको सामाजिक, आर्थिक विकासमा थप टेवा पुग्ने विश्वास ब्यक्त गर्नुभयो ।
