दाङमा चालु आर्थिक वर्षको चार महिनामा साढे तीन सयभन्दा बढी घरेलु तथा साना उद्योग दर्ता भएका छन् । आर्थिक वर्ष २०८१–०८२ को साउनदेखि कात्तिक महिनासम्म जिल्लामा तीन सय ६६ घरेलु तथा साना उद्योग दर्ता भएका हुन् । दर्ता हुनेमा उद्योगतर्फ एक सय ४२ वटा र वाणिज्यतर्फ दुई सय २४ वटा रहेको घरेलु तथा साना उद्योग कार्यालय दाङका सूचना अधिकारी गोपाल पौडेलले जानकारी दिनुभएको छ ।
सूचना अधिकारी पौडेलका अनुसार कात्तिक महिनामा उद्योगतर्फ २४ वटा र वाणिज्यतर्फ ३७ वटा गरेर ६१ वटा, असोज महिनामा उद्योग २६ वटा र वाणिज्यतर्फ ४२ वटा गरेर ६९ वटा, भदौ महिनामा उद्योगतर्फ ४१ वटा र वाणिज्यतर्फ ५६ वटा गरेर ९७ वटा र साउन महिनामा उद्योगतर्फ ५१ वटा र वाणिज्यतर्फ ८८ वटा गरेर एक सय ३९ वटा व्यावसायिक फर्म दर्ता भएका छन् ।जिल्लामा नयाँ तीन सय बढी व्यवसाय थपिँदा उद्योगतर्फ २० करोड ८० लाख २८ हजार र वाणिज्यतर्फ १९ करोड ४५ लाख ५१ हजार रुपियाँ गरेर कुल ४० करोड २५ लाख ७९ हजार रुपियाँ लगानी थपिएको घरेलु तथा साना उद्योग कार्यालयले जनाएको छ ।
