२३ पुस/ रोल्पा सुनिलस्मृती गाउँपालिका-६ गजुल दलंगाका ३३ वर्षीय शिक्षक तारानाथ थापाको आज बिहान सुतेकै अवस्थामा निधन भएको छ। उनी राष्ट्रपतिको रनिङ शिल्ड प्रतियोगिताका लागि विद्यालयका विद्यार्थीहरूलाई लिएर सुलिचौरमा कोठा लिएर बसेका थिए।
आज बिहान ३ बजेतिर थापाले उठेर फेरि ६ बजे उठ्ने भन्दै सुत्न गएका थिए। तर, उनी त्यसपछि उठेनन्। साथीहरूले बोलाउँदा कुनै प्रतिक्रिया नआएपछि उनी मृत अवस्थामा फेला परे। इलाका प्रहरी कार्यालय सुलिचौरका इन्स्पेक्टर अरुण तामाङका अनुसार, थापाको शरीरमा कुनै प्रकारको चोटपटक देखिएको छैन। घटना शंकास्पद नभए पनि मृत्युको यकिन कारण पत्ता लगाउन थप अनुसन्धान भइरहेको छ। शवलाई पोस्टमार्टमका लागि तयारी भइरहेको पनि प्रहरीले जनाएको छ।
तारानाथ थापाका बुवा दिलबहादुर थापाले छोराको असामयिक निधनले परिवार र गाउँमा ठूलो शोक परेको बताएका छन्। उत्कृष्ट शिक्षकका रूपमा चिनिएका थापाको निधनले स्थानीय समुदायलाई स्तब्ध बनाएको छ।
