राप्ती गाउँपालिकामा पहिलोपटक कृषि हाटबजार सञ्चालनमा आएसँगै किसानहरू उत्साहित भएका छन् ।
गाउँपालिकाको आयोजना तथा राप्ती कृषि हाट बजार व्यवस्थापन तथा सञ्चालन समितिको समन्वयमा हाटबजार सञ्चालन गरिएको हो । राप्ती गाउँपालिका–३ मसुरियादेखि उत्तरपट्टि रहेको सिरीचौर मैदानमा सञ्चालित हाटबजारमा ७५ जना किसानले आफ्नो उत्पादन बिक्रीका लागि राखेका थिए । हाट बजारमा किसानले तरकारी, फलफूलसँगै स्थानीय उद्यमीहरुले स्थानीय कच्चापदार्थ प्रयोग गरी निर्माण गरेका साबुन, हार्पिक, धूप, दुना, टपरी, कपडा, कुशन र बाँसका सामग्रीहरू समेत बिक्री गरेका थिए । राप्ती गाउँपालिकाका अध्यक्ष प्रकाश विष्टले शुक्रबार हाटबजारको औपचारिक उद्घाटन गर्दै अबदेखि प्रत्येक शुक्रबार हाटबजार सञ्चालन हुने जानकारी दिनुभयो ।
गाउँपालिका उपाध्यक्ष कमलापती चौधरीले हाटबजारले स्थानीय अर्थतन्त्रलाई चलायमान बनाउने र कृषकहरूलाई थप लगानी गर्न प्रोत्साहन गर्ने बताउनुभयो । वडा नम्बर ३ का अध्यक्ष उमेश अधिकारीले हाटबजारले स्थानीय स्तरमा रोजगारी सिर्जना गर्ने र कृषिमा आधारित अर्थतन्त्रलाई बलियो बनाउन सहयोग पु¥याउने बताउनुभयो ।
राप्ती कृषि हाट बजार व्यवस्थापन समितिका अध्यक्ष दुर्योधन पाण्डेको अध्यक्षता तथा गाउँपालिका अध्यक्ष प्रकाश विष्टको प्रमुख आतिथ्यतामा सम्पन्न उद्घाटन कार्यक्रममा हाटबजार व्यवस्थापन समितिका सचिव राजकुमार आचार्यलगायतले शुभकामना व्यक्त गर्नुभएको थियो । कृषि विकास शाखा प्रमुख बरसाती गडरियाको स्वागत मन्तव्यबाट शुरु भएको कार्यक्रमको सहजीकरण आर्थिक विकास शाखा प्रमुख दामोदर आचार्यले गर्नुभएको थियो । हाटबजारको नियमित सञ्चालनले स्थानीय उत्पादनलाई प्रोत्साहन गर्दै आत्मनिर्भर बनाउन योगदान पुग्ने विश्वास सरोकारवालाले गरेका छन् ।
